( عض قلبى ولا تعض رغيفى ) يبقى طالع عينك فى طابور مطعم عشان تجيب كام سندوتش تفطر بيهم واول ما تحصل على السندتوشات بعد انتظار ولهفه و...
( عض قلبى ولا تعض رغيفى )
يبقى طالع عينك فى طابور مطعم عشان تجيب كام سندوتش تفطر بيهم واول ما تحصل على السندتوشات بعد انتظار ولهفه ومعارك بينك وبين افراد الطابور وتروح تقعد فى مكان شغلك وتبتدى تفتح كيس السندوتشات عشان تتهنى بفطارك اللذيذ , تتفاجىء بجارك الرخم ابو ضحكه باردة راح ناططلك زى القضا وهابد منك احلا واغلا رغيفين وانت مبحلق فى وشه مش عارف تعمله ايه وهو ولا فى الدماغ , لا وكمان اية .. يقولك بكل غلاسة متناهية فى الرخامه : انت ماجيبتش مخلل ليه !!!
ساعتها انت بقى نفسك تنط فى كرشة او تخطف منه السندوتشات وتناوله بوكس يبوظ معالم وشه اكتر ما هو بايظ , بس انت ياعينى ما بتلحقش تعمل حاجة لأنه بيعمل عملته ويخلع فى ثوانى ,
تبص حضرتك لباقى حلمك تلاقيه اتفرتك كأنه طالع من حرب , هتعمل ايه بقى مفيش قدامك غير انك تشق ريقك باللى فاضل وانت بتسب وتلعن شكل امه ورخامته اللى ملهاش زى ,
ولأنك محترم زيادة عن اللزوم مع ناس الأحترام معاه يخسرك كتير .. تيجى تانى يوم قبل ما تجيب فطار تسأله هتفطر يقولك هو بكل قناعة : لأ ماليش نفس
.. طبعا حضرتك هترتاح نفسيا وتقول فى عقل بالك ان الفطار النهاردة هيكون من نصيبك لوحدك وجارك الغلس خلاص حس بغلطته ومش هيكررها , وتروح ياعينى تدخل فى معركة كل يوم عشان الكام رغيف واول ما ترجع تلاقى صاحبك مستنيك وهبد منك نفس السندوتشين بتوع امبارح بكل برود .
بص بقى يا محترم .. الناس اللى من النوع ده ملهمش غير حل واحد تحرق بيه دمهم للأبد . انت تجيب فطارك عادى زى كل يوم وتحطه فى كيس اسود وتدخل تقعد على مكتبك او فى محلك وتحط الكيس فى الدرج وتروح مطلع سندوتش واحد بس وتمسكه فى ايدك , طبعا جارك الرخم زى كل مرة هيستنى ثوانى ويروح جايلك يجرى عشان ياخد نصيبه , واول ما يدخل عليك هيلاقى فى ايدك سندوتش واحد بس .. هيفضل يتلفت يمين وشمال بيدور على الكيس , تروح انت واخد قطمة كبيرة من السندوتش ،
وبعدين تمد السندوتش ناحيته وانت متبت فيه وتروح عازم عليه ياكل معاك , وساعتها هتلاقى جارك الرخم عنده رد من اتنين حسب درجة رخامته .. يا اما يسألك عن باقى السندوتشات وانت بقى ساعتها هتقوله مفيش غير سندوتش واحد بس , يا اما هيمد ايده ياخد السندوتش اللى فى ايدك وساعتها انت بقى تروح مرجع ايدك تانى وتكمل اكل فى السندوتش بكل برود وانت بتضحك فى وشه نفس الضحكة الرخمة بتاعته , هتلاقى جارك الرخم علطول اتكسف على دمك ومشى وحس انك فقسته ومش هايكرر عملته تانى ,
اما بقى فى حالة انه كان رخم اوى اوى اوى ورجع يعمل معاك نفس الحركات الرخمه تانى فانت بقى مفيش قدامك غير المواجهه المباشره مع الأشكال دى , يعنى تجيب فطارك عادى وتحطه قدامك وتستنى جارك الرخم , واول ما ييجى وهو بيمد ايده تروح انت خاطف الكيس ناحيتك وتقوله : مطعم فلان الفلانى فى الشارع اللى ورانا لو جعان روح اشتريلك فطار بدال شغل السنكحة اللى انت فيه . وبكده يا محترم نقولك بالهنا والشفا مدى الحياة .
***
محمد عبدة زيدان
التعليقات