كل ثانية وانت بخير

1 ـ جربت تكون متفائل ومتشائم فى نفس الوقت , طب جربت تكون فرحان وحزين فى نفس ذات اللحظة , طب جربت تعيش اكتئابك فى عز انفتاحك ع الحيا...

1 ـ جربت تكون متفائل ومتشائم فى نفس الوقت , طب جربت تكون فرحان وحزين فى نفس ذات اللحظة , طب جربت تعيش اكتئابك فى عز انفتاحك ع الحياة وحبك الشديد لكل حاجة بتحصلك .........؟!

ممكن جدا تكون جربت احاسيس متناقضة لأن الحياة ببساطة بقت بتتغير فى ثانية , وانا اكيد زيك ممكن اكون جربت .. بس الأهم من ده كله هو انك تقدر ترسى على احساس مريح , يعنى تحاول تغلب أى احساس بيحبطك .. لأن الفرح مش دايم ولا الحزن دايم , ومدام مفيش حاجة بتفضل على حالها والحياة هتفضل كده كده ماشية سواء فرحت ولا زعلت يبقى الأفضل نعيشها واحنا مبتسمين مهما كانت سودة فى وقت من الأوقات .

2 ـ كتير حطينا ثقتنا فى ناس وافتكرنا من رابع المستحيلات يطلعوا شمال .. لكننا بنتفاجىء ان الشمال نفسه اتخلق عشانهم وان الندالة والوطينة لو سابتهم مش هتلاقى حضن حنين .....!!

وعلشان كده فى علاقتك مع اى حد خليك حاطط فى بالك ان الحد ده مهما كان غالى عليك هو فى النهاية صفر على الشمال , علشان لو حب يخرج من حياتك فى اى وقت ما تحسش بأى خسارة من اى نوع , بس الأحساس دة خليه جواك انت بس .. يعنى يفضل ( توب سيكريت ) بينك وبين نفسك .

3 ـ الحب يمكن يكون احلا حاجة فـ الدنيا فى وقت ما انت بتحب .. لكن علامات الأستفهام اللى حوالية مستحيل حد يحلها ....!!

يعنى فى عز احساسك بشريك قلبك واحلامك المؤقتة خليك فاكر انه ممكن فـ يوم وليلة ما يبقاش معاك لأى سبب من الأسباب .. وعلشان كده ما توقفش حياتك على اى حب يقابلك لأنك ممكن تقابل حب غيره ينسيك الحب الأولانى لو حصل فراق بينكم , واصلا عمر الحياة ما وقفت على حد ولا عمر حد مات عشان ساب حبيبه او حبيبه سابه .

4 ـ العمر والأيام اللى بتعيشها عبارة عن جبل عالى بسلالم من على الجنبين ...!!

سلالم مخصصه للطلوع والتانية للنزول وانت ملزوم تطلع لحد قمة الجبل حتى لو نفسك كان هيتقطع , وملزوم كمان تنزل من الناحية التانية على السلالم .. فمتسألش نفسك كتير ايه المغزى من طلوع جبل الحياة لحد اخرة والنزول تانى , لأن فيه حاجات احنا جينا عشان تكون مفروضه علينا بدون مناقشة .. لكن تقدر تعمل حاجة احسن , انك حتى فى عز التعب حاول تكون مستمتع بكل خطوة بتمشيها , لأن كل خطوة بتقربك للراحة الأبدية وهناك بقى هتلاقى كل الطلاسم اتفكت وابقى ساعتها اسال براحتك عن معنى طلوع ونزول الجبل .

ولو زهقت من كل حاجة واى حاجة فى الحياة وحسيت ان الحياة مدياك ضهرها امشى انت بضهرك لأن قفاك هو الوحيد اللى ممكن يكون حائط صد كويس لأى ريح مهما كانت قوية .

اقرأ ايضا : مصير اليناصورات

***

محمد عبدة زيدان