تبقى الواحدة من دول لسه يادوبك طالعة من اولى اعدادى وبدال ما تقول يا هادى وتشوف مذاكرتها تلاقيها ركزت مع الواد الموّز ابو جل فى ش...
.jpg)
تبقى الواحدة من دول لسه يادوبك طالعة من اولى اعدادى وبدال ما تقول يا هادى وتشوف مذاكرتها تلاقيها ركزت مع الواد الموّز ابو جل فى شعره اللى مسقط بنطلونه ومبين حتة من البوكسر ، وتفضل طول الوقت فى الفصل سرحانة ومتسهوكة على روحها بتفكر فى البرنس اللى خطف قلبها من اول وقفة ليه على باب مدرستها ، وليل ونهار ونهار وليل عايشة دور حبيبة مهند فى العشق الممنوع ، يا بنتى ده انتى اخرك تبقى مهتمة بالواجب بتاع المستر ولا الميس .. حب ايه يا منيله منك ليها اللى بتفكرى فيه وانتى اصلا المفروض تشربى اللبن وتنامى من المغرب زى الفراخ ، ده انتى يادوبك لسه عارفه تدخلى التواليت لوحدك من سنتين تلاته ، انتى اللى زيك لسه ماطلعش من البيضة .. هتعيشى دور اكبر منك ليه واخرتها الموّز ده هيمشى وتبتدى تعيشى دور الحزينة المجروحة وتفضلى تنزّلى فى بوستات على الفيس بوك عن جرح المشاعر والحب الضايع ، احييييه عليكى بالاسكندرانى انتى واللى شبهك يا ام مخ فشنك .. ده البرنس بتاعك ابو بوكسر دباديبى لسه بياخد مصروفه من ابوه وكمان فاشل فى الدراسة ولا نافع لا فى سين ولا فى جيم ، لأ والواحدة من دول قال ايه بتحلم بالكوشة مع حبيب القلب .. كوشة ايه دى اللى بتحلم بيها ، وان شاء الله يا ختى منك ليها فاكرة نفسك هتلبسى فستان عروسة وانتى لسه طفله كده وما تعرفيش الألف من كوز الدرة ، ده فى الحالة اللى انتى فيها دى مش هاينفع معاكى فستان .. احنا هنوفرلك مريلة حلوة مقططة شبه افكارك الرومانسية عشان تلبسيها والبيه بتاعك هنلبسه شورت وفانلة بحمالات ، وبعد الجواز تبقى تيجى مامتك تحضرلك اللبن وتذاكرلك كمان .. والبيه جوزك ابو بوكسر دباديبى يروح يشتغل صبى ميكانيكى عشان يوفرلك كتب وكشاكيل الدراسة يا ستار مدرسة الأعدادى ، افضلى انتى كده احلمى لحد ما تلاقى روحك متسيطة بين كل اطفال جيلك ولاد وبنات انك شمال واخرتها تاخدى دبلوم بالعافية وانتى ميح فى كل حاجة وتقعدى فى بيتكم مستنيه العدل ، فوقى يا طفله منك ليها .. محدش بيفكر فى الحاجات الهبله دى فى السن بتاعكم الا وهيلاقى نفسه فى الضياع ، ومش عشان حسيتى انك بقيتى انسه تبقى الحكاية سهله والرومانسية مقطعه بعضها جواكى .. لا يا اوخوتشى ده انتى لسه يادوبك عارفه الفرق بين السكر والملح السنة اللى فاتت بس ، لمى نفسك واعرفى انتى بتفكرى ازاى .. باباكى ومامتك ما يستاهلوش منك كده ابدا على فكرة ، ولو شايفه الموضوع تسلية مش اكتر روحى اتفرجيلك على فيلم كرتون احسن على اى قناة من قنوات الأطفال اللذيذة .
***
محمد عبدة زيدان
التعليقات