يعنى ايه كل واحد عندى عَ الفيس اول ما ينزل صورة او بوست اعمله بسرعة البرق لايك واول انا ما انزل حاجه الناس تعمل من بنها .. ليه يا...
يعنى ايه كل واحد عندى عَ الفيس اول ما ينزل صورة او بوست اعمله بسرعة البرق لايك واول انا ما انزل حاجه الناس تعمل من بنها .. ليه ياعم هو انا اسرائيلى ولا ايه ما تخلوا عندكو دم شويه واحساس بالمسئوليه دنا حتى ذوق اوى وبقدر كل الفريندس حتى لو نزلوا بوست بايخ بعمل لايك ، ومش بس كده كمان دنا من كتر ذوقى بعمل كومنت الضحكة ( ههههههه ) و ( كركركر )
، حسوا بينا بقى وبطلوا انانية .. ولا عشان اللى منزل البوست دكر ما حدش يعبروا ، طب عليا النعمة انتوا عالم تيييت بجد .. يعنى لو كان البوست ده لأنثى هتلاقى الكل ضارب لايكات وكومنتات للصباح الباكر بمناسبة ومن غير مناسبة .. طب الاهى وانت جاهى الفيس بتاعكو يجيلوا شلل رباعى وجلطة ، ده الواحد منكم يبقى واخد صورة سيلفى فى الحمام ومفكر نفسه توم كروز وانا اقول ماشى ما يضرش اديله لايك وارفع من روحه المعنوية يمكن يحس على دمه المرة الجاية ويخلى باله منى ويرزعنى لايك يفرح قلبى زى منا بفرح قلبه على اى حاجه ينزلها .. لكن مفيش فايدة برضه البعيد منكم اللى مش حاسس بحجم المعاناه النفسية اللى الواحد بيحس بيها كل ما يشوف اللايكات يادوب يتعدوا على صوابع الإيد العشرة ، خلوا بقى عندم دم .. النهاردة عندى وبعد شوية عندك ، ده الفيس كله اوضتين وصالة .. هنروح من بعض فين ، ولا انتوا ماشيين بمبدأ ادينى فى الهايف وانا احبك يا فننس ، يا بنى ادميين الحياة ما بقاش فيها حاجه تلذ خالص .. يعنى مش لازم الواحد ياخد لقب مرحوم عشان يتهرى لايكات وكومنتات ، انتوا كده ما بتحسوش بقيمة الناس اللى زيى غير لما ينتقلوا الى الدار الأخرة ، بس خلاص بجد انا زهقت من الأشكال اللى ما بتقدرش دى وقررت اخيرا انى مش هامشى اوزع لايكات ع اللى يسوى واللى مايسواش .. يعنى م الأخر كده اللى هايعملى لايك هاعمله عشرة واللى هيعملى كومنت هاعمله كومنت وشير كمان ومش بعيد احط صورته بدال صورتى فى البروفايل .. علشان ده طلع رجولة مش عيل تييت زيك انت وهو وهو يا عالم يا منفضتيه .
التعليقات