يخربيتك يا مارك ويخربيت شورتك المنيلة بتاعت الفيس بوك دى ، انت خليت اللى يسوى واللى ما يسواش يبقاله اكونت ، ومن بعد ما كان الواحد بيتب...
يخربيتك يا مارك ويخربيت شورتك المنيلة بتاعت الفيس بوك دى ، انت خليت اللى يسوى واللى ما يسواش يبقاله اكونت ، ومن بعد ما كان الواحد بيتباهى بالأكونت بتاعه ع الفيس .. بقى الواحد كل ما يدخله يجيله اكتئاب من الأشكال اللذيذه الظريفه اللى غرقّت الفيس وطرطشت علينا , يعنى حضرتك مش عارف تتعلم من تويتر ابن الناس الكويسين .. دانت بقيت زى رقصات الأفراح الشعبيه اللى شبه سوسن بدر فى فيلم الفرح بعد ما كلت البونيه فى وشها من خالد الصاوى .
يعنى فى تويتر الله يمسيه بالخير عمرك ما هتلاقى اكونت لواحد معتوه اسمه ( الأصلى ) ولا ( الفخم ) ولا ( انا صلا جامد ) ، وكله كوم واللى مسمى الأكونت بتاعه ( مكسل اكتب اسمى ) ، طب واحنا مالنا ياعم انت ان شالله ما كتبته .. احنا ناقصين عته ، ولا الأموره اللى كاتبه ( بنوته عثوله ) ، طيب واحنا يخصنا فى ايه ان كنت عثوله ولا شبه سيد قشطه .. الحكايه مش ناقصاكى خالص على فكره .
ده انت وريتنا ايام يا عم مارك تتسجل فى التاريخ بـ ( المزرعه السعيده ) ، كنت تحس ان مصر كلها بتلعب اللعبه البيض دى ، وكله بقى يبعت صداقه لكله عشان يستلف خشب ولا مسامير يكمل بيها مزرعته السعيده ، لأ والأغرب من ده كله لسه فيه بنى ادميين لسه بتلعب اللعبه دى .. كأننا فى العصر الحجرى لسه ، ويادوبك خلصنا من حكاية المزرعه السعيده وظهرلنا ( كندى كراش ) ، ما هى الحكاية كانت ناقصه جلطات ، وطول النهار والليل اشعارات اشعارات .. ايه يا عم انت وهو يخربيت ابو الغباء احلفلكو بايه ان مش عايز اتنيل العبها .. خفوا شويه مش كده الرحمه حلوه برضه .
الفيس بوك اتعمل عشان نستفيد ونبقى منفتحين ع العالم .. لكن عندنا احنا بندخله عشان ننفتح ع الحمامات ، لأننا ابطال فى الهيافه والكلام الفاضى ، والناس دى اللى بيدخلوا ع الفيس وفاكرين نفسهم عالميين دول مكانهم مش هنا .. دول مكانهم فووووق مع الكائنات العجيبه وموطنهم الأصلى لازم يكون فى الغابات .
الفيس بجد بقى عقيم عقم السنين والواحد فيه بيحس نفسه معتوه من ضمن معاتيه الفيس .. لكن فى عمنا التويتر الموضوع مختلف .. ده كفايه يا راجل بيقولك غرد يعنى انت بالنسباله عصفوره رقيقه هتقول ( سو سو ) ، يعنى بيحترمك كبنى ادم هتقول حاجه كويسه مش اى هرتله زى بتاعة الفيس ، ولا الصور بتاعته تفتح النفس اجدع ، وكفايه ان مشاهير العالم بيستخدموه ، مش زى الفيس اللى بقى ملطشه للى رايح واللى جاى ، يعنى انت مستنى ايه من حاجه دخلها سواقين التكاتك والعيال التييت اللى داخلين عشان يظبطوا موّزه وخلاص وتلاقيهم راشقين نفسهم زى البراشوت فى اى حوار فيه بناويت ، اتعلم بقى يا عم مارك وكفايه فضايح .. خليت شكلنا عار قدام الأجانب .
ربنا يخليك لينا يا تويتر يا ابن الناس الكويسين يا كينج ويبعد عنك العيال والبنات السيس بتوع الفيس بوك ، ويبعد عنك المزرعه السعيده وكندى كراش والصور السيلفى اللى فى التواليت .
***
محمد عبدة زيدان
التعليقات